អាវុធហត្ថរាជធានីភ្នំពេញ បញ្ជូនចោរលួចគាស់ផ្ទះ ០១នាក់ ទៅតុលាការ
31-October-2019 | ដោយ ពលមនសិការ
ភ្នំពេញ៖ នៅថ្ងៃទី៣១ ខែតុលា ឆ្នាំ២០១៩ សមត្ថកិច្ចជំនាញនៃការិយាល័យស្រាវជ្រាវបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ បានបញ្ជូនជនសង្ស័យ ០១នាក់ ទៅតុលាការ ដើម្បីផ្តន្ទាទោសតាមច្បាប់ ដែលរូបគេជាចោរលួចគាស់ផ្ទះប្រជាពលរដ្ឋ ដើម្បីលួចយកទ្រព្យសម្បត្តិមានតម្លៃ។
មន្ត្រីកងរាជអាវុធរាជធានីភ្នំពេញ បានឱ្យដឹងថាជនសង្ស័យឈ្មោះ សូ សារិន ហៅពៅ ភេទប្រុស អាយុ២៧ឆ្នាំ ត្រូវបានកម្លាំងមូលដ្ឋានអាវុធហត្ថខណ្ឌចំការមន ឃាត់ខ្លួន បន្ទាប់ពីរូបគេបានធ្វើសកម្មភាពលួចគាស់ផ្ទះមួយកន្លែង ចូលយកបានម៉ាស៊ីនត្រជាក់ ,ទូរសទស្សន៍ និងស្ពាន់ ជិត០៤គីឡូក្រាម នៅចំនុចផ្ទះលេខ ៧៨BE0 ផ្លូសុធារស សង្កាត់ទន្លេបាសាក់ ខណ្ឌចំការមន រាជធានីភ្នំពេញ កាលពីថ្ងៃទី២៧ ខែតុលា ឆ្នាំ២០១៩ វេលាម៉ោង០២៖០០នាទីរំលងអធ្រាត្រ។
ក្រោយពេលសមត្ថកិច្ចអាវុធហត្ថឃាត់ខ្លួនបាន យកមកសួរនាំ រូបគេសារភាពឲ្យដឹងថា បានធ្វើសកម្មភាពលួចគាស់ផ្ទះយកសម្ភារៈ ជាមួយនិងបក្ខពួកម្នាក់ទៀត ឈ្មោះ ចាន់ ថន ភេទប្រុស អាយុប្រហែល៤០ឆ្នាំ(គេចខ្លួន) នៅចំណុចខាងលើ ពិតប្រាកដមែន ដោយរូបខ្លួន ជាអ្នកជញ្ជូនឥវ៉ាន់ ឲ្យទៅឈ្មោះ ចាន់ ថន ជាអ្នកចាំទទួលយកនៅខាងក្រៅផ្ទះ ដើម្បីយកទៅទុក តែរូបគេ ពុំបានចេញពីក្នុងផ្ទះនោះទេ គឺបាននៅរើកកាយ រកមើលលួចសម្ភារៈបន្តទៀត ក៏ត្រូវបានសន្តិសុខឃើញ បានប្តឹងសមត្ថកិច្ចអាវុធហត្ថខណ្ឌចំការមន ដែលកំពុងល្បាតក្នុងភូមិសាស្ត្ររបស់ខ្លួន ចុះមកឃាត់ខ្លួនតែម្តង។ ជនសង្ស័យ ខាងលើ បានប្រាប់ឲ្យដឹងទៀតថា កន្លងមករូបគេ និងឈ្មោះ ចាន់ ថន(គេចខ្លួន) ធ្លាប់ធ្វើសកម្មភាពលួចគាស់ផ្ទះបានជាច្រើនលើក ក្នុងភូមិសាស្ត្ររាជធានីភ្នំពេញ និងថែមទាំងធ្លាប់ធ្វើសកម្មភាពឆក់ទូរស័ព្ទពីប្រជាពលរដ្ឋដែលធ្វើដំណើរលើដងផ្លូវបាន ០២លើកដែរ ហើយពួកគេតែងតែប្រើប្រាស់គ្រឿងញៀនជាប្រចាំថ្ងៃ ៕
ចំនួនអ្នកទស្សនា
- ថ្ងៃនេះ7851
- ម្សិលមិញ20231
- សប្តាហ៍នេះ86931
- ខែនេះ108811
- ឆ្នាំនេះ108811
- សរុប20551267